السلام عليكم ورحمة الله وبركاته

اولا وقبل كل شىء دى مش دعوة اننا نبطل رجيم او نأكل براحتنا
عشان ما حدش يزعل منى او يتحجج بالمدونة.
هتقولوا امال المدونة ده عشان ايه؟
اقولكم

اولا باين من اسم المدونة انى تخينة وعايزة اخس

بس مش هى دى الفكرة بس

او بمعنى اصح مش هى دى الفكرة الاساسية او الوحيدة للمدونة
المدونة هتكون مكان نقدر نقول فيه اننا بنحب الاكل
وتخان علشان بناكل مش عشان الأسباب الى بنضحك بها على الناس وعلى نفسنا
وان الرجيم شىء صعب جدا ومتعب وفى بعض الأحيان مدمر للحالة النفسية
واننا بنحب الأكل وبالرغم من كده احنا آدميين مش حيوانات زى ما كل الناس بتحب تعذبنا وتشبهنا
وان لنا حسنات كتير تغطى على عيبنا الى ممكن يكون الوحيد فى نظر اقرب الناس لينا ومش شايفين غيره
وان الأكل فى بعض الأحيان بيكون متعتنا الوحيدة فى الدنيا الى مش مريحة حد
واننا ساعات بناكل عشان نعوض حاجات كتيرة مفتقدينها
وساعات بناكل بس عشان عايزين ناكل
بنحب الأكل وده مش عيب ولا حرام ولا جريمة ولا ذنب لا يغتفر
بس على فكرة المدونة هتكون كمان المكان الى هنقول فيه اننا مش هنستسلم ونحاول نقلل اكلنا ونضبط حياتنا عشانا احنا مش عشان الناس الى مش عاجبهم شكلنا

المدونة هتكون المكان الى هنفضفض فيه عن مشاعرنا واحزانا
ما هو احنا عارفين كل الرجيمات والنصايح وجربناها وفشلنا او تعبنا واستسلمنا
وكل مرة واحدة تقولك اتبعى الرجيم الفلانى وهتخسى
الموضوع مش محتاج عبقرية
رجيم يعنى مش هتاكلى10%من الى بتاكليه
طيب ما انا لو قادرة اعمل كدة ما كنتش هبقى تخينة اصلا

بس ممكن من وقت للتانى الاقى نصيحة كويسة او معلومة مفيدة واكتبها

بس افتكر انها مش هتكون رجيم, لا هتكون حاجة تساعدنا نخس من غير حرمان وانظمة

عادات صحية بسيطة وحاجات نقدر نطبقها بسهولة

وهحكى لكم كمان عن يوميات مع الرجيم او بمعنى اصح مع الفشل فى الرجيم

ويومياتى فى الجم وتعليقات الى حواليا وحكاياتهم

حاجات كتير هنقولها يمكن نلاقى حد يسمعها ويفهمها والاهم يحسها

وبكده نكون افتتحنا المدونة

والى لقاء